U Scirocco

 Una bella poesia di Carmine Pagano tratta dal libro "SANGUE 'I ROTUNE Poesie Ponzesi"

U Scirocco

Te susse a dìnt' u liette 'pa matina

e te siente 'na schifezza, ma comm'è?

te muove ma te fanno male 'i rine

te pesa a capa e nun sai 'u pecchè.

Po' arape 'na fenesta e te n'adduone

'u ciele è cupe, è negliuso e comme se

passanno quacche d'uno dispettuse

l'avesse fatta apposta sulo a te.

Poi piense "Ma comm'è sta musciarìa?

ch'avimme fatte 'i male pe' scuntà

sta cappa e neglia, stu senzo 'i pecundrìa

ca sulo 'u scirocco te sape purtà".

Pe' uno gione, che è chino d'energia

nun ce stanno tiempi cu sanno fermà, 

ma chi tene quacche acciacco arassèsia

'nu tiempo peggio nun'u ponno capità.

I' per esempio mo tengo 'na zia, 

che è vecchia e soffre 'i core, e quanno che

capita na jurnata 'i musciaria

se jetta 'n'coppa a seggia e se venteia, 

lle manca 'u ciate e pensa a chissà che.

Ll'èpassa annanzi 'a vita soja vissuta,

doppo tant'anni nun sa ancora 'u ppecchè

da guerra e 'a famme ch'hanno patuto,

 e 'i chillu figlio che n'è chiù turnato, 

povera vicchiarella disperata.

Passa a jurnata soja cu stu dulore

chiena 'i malincunia e ...n'fosa 'i sudore.

Nota:

"pecundrìa" significa voglia di non far niente

Nelle foto: Isola di Ponza, scirocco alla Parata, estate 2015